Museveni yavuze ko yiteguye intambara n’abarwanya itegeko rihana abatinganyi

Perezida wa Uganda Yoweri Museveni yihanije amahanga kubera ukuntu yamaganye itegeko rihana abaryamana bahuje ibitsina bazwi nk’abatinganyi yashyizeho umukono muri iki cyumweru.

Museveni yashimangiye ko gushyira umukono kuri iryo tegeko ari ikintu cyamaze kurangira, yamagana abamusaba kurikuraho.

Mu itangazo rya nyuma y’inama yagiranye n’abo mu ishyaka NRM riri ku butegetsi muri Uganda, yavuze ko gushyira umukono ku itegeko rihana ubutinganyi byarangiye, nta muntu n’umwe uzabanyeganyeza ndetse ko bakwiye kwitegura intambara.

Ibi abivuze nyuma yuko ibihugu byo mu burengerazuba ni ukuvuga Uburayi n’Amerika ndetse n’imiryango iharanira uburenganzira bwa muntu yaho, bamaganye iryo tegeko.

Perezida w’Amerika Joe Biden yanenze iryo tegeko, avuga ko ari ihonyora ribabaje cyane ry’uburenganzira bwa muntu ku isi, asaba ko rikurwaho, yongeraho ko Amerika irimo gutekereza ku gufatira ibihano Uganda.

Umuryango w’Ubumwe bw’Uburayi n’umukuru w’umuryango w’abibumbye António Guterres, na bo bamaganye iryo tegeko.

Gushyira umukono kuri iryo tegeko kwabaye nyuma yuko inteko ishingamategeko ya Uganda yari yagabanyije ubukana bwaryo ariko riracyari rimwe mu mategeko akaze cyane ku isi ahana abatinganyi.

Umuntu uwo ari we wese uhamijwe n’urukiko ko akora imibonano y’ubutinganyi ashobora gukatirwa gufungwa burundu.

Iryo tegeko rinateganya igihano cy’urupfu ku “butinganyi bukaze cyane”, harimo nko gufata ku ngufu umuntu utagejeje ku myaka 18, cyangwa igihe uwabukorewe yanduriyemo indwara yarwara ubuzima bwe bwose, nka Virusi itera SIDA.