Perezida Kagame na Madamu Jeannette Kagame bitabiriye ubukwe bw’Igikomangoma cya Jordania

Perezida wa Repubulika Paul Kagame na Madamu Jeannette Kagame, bifatanyije n’abandi bayobozi banyuranye ku Isi mu gutaha ubukwe bw’Igikomangoma cya Jorodania Cpt Al Hussein bin Abdullah II na Rajwa Al-Saif.

Perezida Kagame na Madamu Jeannette Kagame bageze muri Amman, mu Murwa Mukuru w’Ubwami bwa gihugu cya Jordania, ku mugoroba wo ku wa Kane tariki 1 Kamena 2023.

Ni ibirori byabimburiwe no gusezerana imbere y’amategeko mu ngoro ya Zahran hanyuma hakurikiraho kwakira abitabiriye ibirori byabereye mu ngoro ya Al Husseiniya.

Mu bitabiriye ibi birori harimo na William Igikomangoma cya Wales mu bwami bw’u Bwongereza.

Igikomangoma Hussein yavutse kuwa 28 Kamena 1994 mu bitaro byitiriwe Umwami Hussein, akaba avuka ku Umwami Abdullah n’Umwamikazi Rania.

Hussein ni izina yahawe bivuye ku rya sekuru Umwami Hussein. Afite nyirakuru ufite inkomoko mu Bwongereza na nyina ukomoka muri Palestina.

Ni we mfura mu muryango w’iwabo. Avukana n’abana batatu ari bo Igikomangomakzi Iman, Igikomangoma Salma n’Igikongoma Hashem.

Kuwa 17 Kanama 2022 ni bwo yambitse impeta y’integuza umukunzi we Rajwa Al Saif wo muri Saudi Arabia. Aba bombi bivugwa ko bamenyaniye kuri murandasi.