Kayonza: Polisi yagaruje arenga miliyoni 1.2 Frw yari yibiwe Nyagatare

Polisi y’u Rwanda ku bufatanye n’inzego z’ibanze mu Karere ka Kayonza, yafatanye abantu babiri amafaranga y’u Rwanda 1 266 000 muri miliyoni n’ibihumbi 445 yari yibwe umuturage utuye Nyagatare.

Abafashwe ni umusore ufite imyaka 20 y’amavuko ucyekwaho kwiba ayo mafaranga n’umugabo w’imyaka 47 wamucumbikiye mu karere ka Kayonza nyuma yo gutorokana ayo mafaranga.

Bafashwe ubwo bari bavuye mu kabari ahagana ku isaha ya saa munani z’ijoro, mu mudugudu wa Rwagwa mu kagari ka Cyabajwa mu murenge wa Kabarondo.

Umuvugizi wa Polisi mu Ntara y’Iburasirazuba, Superintendent of Police (SP) Hamdun Twizeyimana, yavuze ko kugira ngo bafatwe byaturutse ku makuru yatanzwe n’uwibwe ayo mafaranga.

Yagize ati: “Nyuma y’uko uwibwe utuye mu murenge wa Rwinyinya wo mu Karere ka Nyagatare, ahamagaye Polisi mu gitondo cyo ku wa Gatatu, avuga ko umukozi we yamutwaye amafaranga ayakuye mu cyumba, kandi ko acyeka ko yerekeje aho akomoka mu Karere ka Kayonza, hahise hatangira ibikorwa byo kumushakisha.”

Yakomeje agira ati: “Yaje gufatirwa mu gasanteri ko mu kagari ka Cyabajwa mu murenge wa Kabarondo, avuye mu kabari ari kumwe na mugenzi we basangiraga inzoga, basigaranye miliyoni 1 n’ibihumbi 266.”

Yemeye ko ari ayo yibye umukoresha we mu Karere ka Nyagatare, andi akaba yari yamaze kuyaguramo telefone igezweho, igikapu n’inkweto andi ayanywera inzoga, avuga ko yari yaje kureba uwo mugenzi we ngo bafatanye kuyakoramo ubucuruzi.

SP Twizeyimana yasabye abantu cyane cyane urubyiruko kwirinda ingeso yo kwiba kuko bibaviramo ingaruka mbi zirimo gufungwa igihe kirekire, ahubwo bagakura amaboko mu mifuka bagakora imirimo ibateza imbere igateza imbere n’igihugu. 

Yashishikarije abaturage kwirinda kujya babika amafaranga menshi mu ngo zabo, bagahitamo kugana ibigo by’Imari n’amabanki mu rwego rwo kuyarinda kwibwa.

Bashyikirijwe Urwego rw’Ubugenzacyaha (RIB) kugira ngo iperereza rikomeze, amafaranga yagarujwe asubizwa nyirayo.

Ingingo ya 166 y’Itegeko nº68/2018 ryo ku wa 30/08/2018 riteganya ibyaha n’ibihano muri rusange, ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri, ihazabu y’amafaranga y’u Rwanda atari munsi ya miliyoni imwe, ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Ingingo ya 167 ivuga ko; ibihano ku cyaha cyo kwiba byikuba kabiri iyo; uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira; kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije cyangwa kwiba byakozwe n’abantu barenga umwe.