Perezida Denis Sassou Nguesso yageze mu Rwanda

Perezida wa Repubulika ya Congo, Denis Sassou Nguesso, yageze mu Rwanda mu ruzinduko rw’iminsi itatu yatangiye kuri uyu wa Gatanu tariki 21 kugeza kuya 22 Nyakanga 2023. Uru ruzinduko rugamije gushimangira umubano usanzwe hagati y’impande zombi.

Ku Kibuga cy’Indege Mpuzamahanga cya Kigali yakiriwe na Perezida wa Repubulika Paul Kagame.

Abakuru b’ibihugu byombi kandi baragirana ibiganiro mu muhezo ibizwi nka tête-à-tête nyuma bayobore ibiganiro byaguye bihuza intumwa z’ibihugu byombi. 

Hateganyijwe kandi ikiganiro aba banyacyubahiro bombi bagirana n’Abanyamakuru.

Mu masaha ya nyuma ya saa sita kandi Perezida Sassou Nguesso kandi arasura Urwibutso rwa Jenoside rwa Kigali ndetse ageze ijambo ku bagize inteko ishinga amategeko.

Mu bayobozi bari kumwe na Perezida Kagame mu kwakira N’Guesso harimo Minisitiri w’Intebe, Dr Edouard Ngirente; Minisitiri w’Ububanyi n’Amahanga, Dr Vincent Biruta; Minisitiri muri Perezidansi, Uwayezu Judith; Minisitiri w’Umutekano, Gasana Alfred n’uw’Ubucuruzi n’Inganda, Ngabitsinze Jean Chrysostome.

Hari kandi Umuyobozi wa RDB; Clare Akamanzi; Ambasaderi w’u Rwanda muri Congo Brazzaville, Mutsindashyaka Théoneste; Meya w’Umujyi wa Kigali, Rubingisa Pudence; Umugaba Mukuru w’Ingabo, Lt Gen Mubarakh Muganga; Umuyobozi Mukuru wa Polisi y’Igihugu, Felix Namuhoranye n’Umunyamabanga Mukuru wungirije w’Urwego rw’Igihugu rushinzwe Iperereza n’Umutekano, Lt Col Jean Paul Nyirubutama.

Perezida Sassou N’Guesso yaherukaga mu Rwanda mu 2019 ubwo yari yitabiriye umuhango wo kwibuka ku nshuro ya 25 Jenoside yakorewe Abatutsi.