U Bushinwa burashinjwa guha u Burusiya intwaro mu ntambara ya Ukraine

Umudipolomate w’u Bufaransa yavuze ko u Bushinwa burimo guha u Burusiya ibikoresho bya gisirikare butakagombye guha iki gihugu.

Ni igisubizo Emmanuel Bonne, yatanze ubwo yari abajijwe mu nama y’umutekano, Aspen Security Forum, niba ibihugu byo mu burengerazuba bw’isi, byaba byarabonye ikimenyetso na kimwe cy’uko u Bushinwa bwahaye intwaro u Burusiya mu buryo ubwo ari bwo bwose, mu ntambara yo muri Ukraine.

Uwo mudiplomate, Emmanuel Bonne, umuyobozi w’itsinda rya dipolomasi muri perezidansi y’u Bufaransa, yagize ati: “Yego, hari ibyerekana ko barimo gukora ibintu tutakwifuza ko bakora”.

Yongeye kubazwa niba u Bushinwa bwaratanze intwaro, Bonne agira ati: “Urebye, bisa n’ibikoresho bya gisilikare…kugeza ubu icyo tuzi n’uko batarimo gutanga byinshi byatuma Uburusiya bugira ubushobozi bwo hejuru, ariko dukeneye ko hatagira ibitangwa.”

Abayobozi b’u Bufaransa babwiye televisiyo ya CNN ko Bonne, yaganishaga ku bijyanye n’ikoranabuhanga ku mpande zombi n’ubundi bufasha harimo ingofero za gisirikare n’ibindi bikingira umubiri amasasu.

Perezidansi y’Amerika n’iy’u Bufaransa ntibyasubije Reuters, ibiro ntaramakuru byo mu bwongereza, ubwo bari basabwe kugira icyo babivugaho.