Kenya: Perezida Ruto yemeye guhura na Odinga mu kuri uyu wa gatatu

Perezida wa Kenya William Ruto avuga ko yiteguye guhura n’umukuru w’abatavuga rumwe n’ubutegetsi Raila Odinga, mu gihe haherutse kuba imyigaragambyo y’abamagana igiciro cy’imibereho kiri hejuru.

Abantu babarirwa muri za mirongo bapfiriye mu myigaragambyo.

Odinga amaze igihe ayobora iyo myigaragambyo yo guhatira leta kugabanya imisoro no kudohora ku bindi biciro biri hejuru.

Ku wa kabiri, Perezida Ruto yanditse kuri Twitter agira ati: “Nshuti yanjye Raila Odinga, ndi mu nama muri Tanzania ku iterambere ry’abakozi igamije guhuriza hamwe kwagura amahirwe y’akazi ku mugabane wacu. Ndagaruka [ku wa gatatu] nimugoroba, kandi nkuko usanzwe ubizi, mfite umwanya wo guhura nawe imbona nkubone igihe icyo ari cyo cyose kikubereye”.

Abitangaje nyuma yuko Odinga agiranye ikiganiro n’abanyamakuru akavuga ko Ruto yanze ubusabe bwa Perezida wa Tanzania bwo guhuza leta n’abatavuga rumwe n’ubutegetsi.

Odinga yamaganye polisi ku bikorwa by’ubugome byayo ku bigaragambya, ndetse yasabye ko kuri uyu wa gatatu habaho ikiriyo cyo guha icyubahiro abantu biciwe mu myigaragambyo.