Polisi y’u Rwanda irashishikariza abaturarwanda kubahiriza amabwiriza yo kugenda mu mazi birinda uburangare bwateza impanuka zahitana ubuzima bwabo mu gihe bakoresha amazi magari.
Byakunze kugaragara ko uburangare bwa bamwe mu babyeyi bareka abana bakegera inkengero z’ibiyaga, inzuzi ndetse n’ahandi hari ibidendezi by’amazi bituma habaho impanuka zo kurohama zigatuma bahatakariza ubuzima, aho abenshi mu bahitanwa n’izi mpanuka usanga bari mu kigero cy’imyaka 15 no munsi yayo.
Si abana bato gusa barohama mu mazi kuko bigenda bigaragara ko hari n’abantu bakuru barohama mu migezi, ibiyaga n’inzuzi bitewe n’uko batazi koga cyangwa se nta zindi ngamba z’ubwirinzi bateganyije nko kwambara umwambaro wabugenewe (Life Jacket) mu gihe bari mu mirimo y’uburobyi, bambuka inzuzi, boga cyangwa bari mu ngendo mu biyaga.
Umuvugizi wa Polisi y’u Rwanda, Commissioner of Police (CP) John Bosco Kabera, mu kiganiro yagiranye n’itangazamakuru ku wa Kabiri tariki ya 25 Nyakanga, ku cyicaro gikuru cya Polisi ku Kacyiru, yasabye abakoresha amazi kubahiriza amategeko n’amabwiriza kugira ngo birinde impanuka zo mu mazi.
Yagize ati: “Ubutumwa tugeza ku banyarwanda bose ni ubw’uko bagomba kubahiriza amategeko n’amabwiriza agenga uburyo bwo kugenda mu mazi ariko cyane cyane nk’abo batwara abantu mu bwato cyangwa se ibyo bakorera mu mazi byose bigengwa n’amategeko. Bakwiye rero kuyamenya kandi bakumva ko kuyubahiriza biri mu nyungu zabo kubera ko ni ku bw’umutekano wabo kugira ngo n’ayo mazi abungabungwe.”
CP Kabera yasabye abakora ubwikorezi bwo mu mazi kuba bujuje ibyangombwa byose bibemerera gutwara abagenzi, bakirinda kuba ba nyirabayazana b’impanuka.
Ati: “Ubwato butwara abantu cyangwa ubukora ubwikorezi hari ibyo bugomba kuba bwujuje birimo kuba bufite moteri ituma bugenda, kutarenza umubare w’abantu bwagenewe gutwara kandi bukagira ubwishingizi, kunyura aho bugomba kunyura no kuba buri mugenzi afite umwambaro w’ubwirinzi (Life jacket). Iyo utubahirije ayo mabwiriza biteza impanuka zibabaje nk’izo tumaze iminsi tubona.”
Umuvugizi wa Polisi y’u Rwanda yashishikarije abantu kwirinda kujya mu mazi babona ko yabateza akaga nk’arimo inyamaswa, gazi, mikorobi cyangwa se ayanduye ndetse no mu gihe habayeho impanuka bakihutira gutabaza bakoresheje ifirimbi iba iri mu mwambaro w’ubwirinzi cyangwa bagahamagara ku murongo utishyurwa ari wo: 110, kugira ngo bahabwe ubutabazi n’Ishami rya Polisi rishinzwe umutekano wo mu mazi.
Post comments (0)