Abasirikare 3 ba Amerika baguye mu gitero cya Drones

Abasirikare batatu ba Amerika baguye mu gitero cy’indege zitagira abapilote (drone), cyagabwe ku birindiro byazo biri mu Majyaruguru ashyira uburasirazuba bwa Jordania, hafi y’imbibi za Syria.

Icyo gitero cyakomerekeyemo n’abandi basirikare b’Amerika 25, cyagabwe mu mpera z’icyumweru gishize.

Perezida w’Amerika, Joe Biden, yavuze ko icyo gitero cyagabwe n’abarwanyi bashyigikiwe na Iran bakorera muri Syria na Iraq.

Imyidondoro y’abasirikare batatu bakiguyemo, izatangazwa imiryango yabo imaze kumenyeshwa ayo makuru. Perezida Biden yabise intwari z’Igihugu ku rwego rwo hejuru, ndetse ko abakoze icyo bazabyishyura.

Ikinyamakuru The Washington Post, cyatangaje ko intagondwa ziyitirira idini ya Isilamu zo muri Iraq, zirimo ishami rya Hezbollah, Nujabaa n’abandi barwanyi bafashwa na Iran biyitiriye icyo gitero.

Umwe mu bayobozi b’abo barwanyi yabwiye, The Washington Post, ko igihe cyose Amerika izakomeza gushyigikira Israheli mu ntambara irimo na Hamas, batazatinya kugaba ibitero ku nyungu zayo.

Uwo muyobozi yakomezje avuga ko batitaye na gato ku cyo Amerika ishobora gukora mu kwihorera kandi ko azi neza uburemere bw’inzira bafashe.