Malawi : Hatangajwe icyunamo cy’iminsi 21 yo kunamira Visi Perezida n’abo bari kumwe baguye mu mpanuka y’indege

Perezida wa Malawi Lazarus Chakwera yatangaje icyunamo mu gihugu hose cy’iminsi 21 cyo kunamira Visi Perezida, Saulos Chilima n’abagenzi bose Icyenda baherutse kugwa mu ndege ya gisirikare yari yaburiwe irengero iza kuboneka bose bamaze gupfa.

Perezida wa Malawi Lazarus Chakwera yahise asaba ko amabendera yururutswa akagezwa hagati kugeza ubwo hazaba umuhango wo kumushyingura.

Umuhango wo gushyingura uwari Visi Perezida wa Malawi uzakorwa na Guverinoma ya Malawi ariko nta tariki nyirizina yatangajwe azashyingurirwaho.

Iyi ndege yari yaburiwe irengero, nyuma y’uko yari imaze guhaguruka i Lilongwe mu murwa Mukuru w’icyo gihugu, mu gitondo cyo kuwa Mbere tariki 10 Kamena 2024 iza kubura ku ikoranabuhanga rya Radar ryerekanaga aho iherereye, birangira iburiwe irengero.

Abasirikare bakomeje kuyishakisha mu ishyamba rya Chikangawa iza kugaragara yashwanyutse n’abari bayirimo bose bapfuye.

Visi Perezida Chilima w’imyaka myaka 51, yaguye muri iyi ndege yari agiye guhagararira leta mu muhango wo gushyingura uwahoze ari Minisitiri Ralph Kasambara wari uherutse kwitaba Imana.