Perezida wa Leta Zunze Ubumwe za Amerika, Joe Biden w’imyaka 81 y’amavuko, yagaragaje ibimenyetso bya Covid-19, bituma ashyirwa mu kato kugira ngo abanze yitabweho nk’uko byatangajwe n’ibiro bye.
Ni mu gihe hari igikorwa cyo kwiyamamaza mu matora ya Perezida wa Repubulika yari ateganyijwe gukorera i Las Vegas, ku wa Gatatu tariki 17 Nyakanga 2024, cyahise gisubikwa nyuma y’uko Perezida Joe Biden yapimwe bikagaragara ko yanduye Covid-19 nk’uko byatangajwe n’umuvugizi we Karine Jean-Pierre mu itangazo ryasohowe na Perezidansi ya Amerika.
Azamuka asubira mu ndege ya Air Force One igendamo Perezida wa Leta zunze Ubumwe za Amerika, Perezida Joe Biden, yabwiye abanyamakuru ati, “ Ndumva meze neza”.
Perezida Joe Biden, ubusanzwe wakingiwe inkingo zose za Covid-19, yagaragaje ibimenyetso byoroheje bya Covid-19, bituma ashyirwa mu kato nk’uko byasobanuwe na Perezidansi ya Amerika.
Uwo muvugizi wa Perezida Joe Biden yakomeje agira ati, “Azakomeza gukora inshingano ze ku buryo bwuzuye no muri icyo gihe ari mu kato, kandi amakuru yerekeranye n’uko ubuzima bwa Perezida buhagaze azakomeza kujya atangwa ku buryo buhoraho”.
Itangazo ryo muri Perezidansi ya Amerika, ryujujwe n’inyandiko y’umuganga wa Perezida wa Amerika, ivuga ko ku gicamunsi yo ku wa Gatatu, aribwo Perezida Joe Biden yatangiye kugira ibimenyetso mu nzira z’ubuhumekero ku gice cyo hejuru, harimo izuru ryarimo rizana ibimyira ndetse n’inkorora yumutse, gusa ibyo bimenyetso ngo byakomeje kuba ibimenyetso byoroheje, akomeza guhumeka neza bisanzwe, ndetse nta muriro yigeze agira nk’uko byemejwe n’uwo muganga.
Uwo muganga kandi yavuze ko Perezida Biden yamaze guhabwa doze ya mbere y’umuti wa Paxlovid, uwo akaba ari umuti ugenewe kuvura za virusi.
Post comments (0)