Umuntu utanze amakuru kuri ruswa arindwa gute?

Urwego rw’umuvunyi rurakangurira abantu gutanga amakuru kuri ruswa n’akarengane, kuko umuntu uyatanze agirirwa ibanga ku buryo nta wahungabanya umutekano we.

Ni ibyagarutsweho n’umuvunyi mukuru Nirere Madelaine, mu mahugurwa y’umunsi umwe yabaye tariki 17 Ukuboza 2024 y’abanyamakuru bakorera ibitangazamakuru bitandukanye mu Rwanda, mu rwego rwo kubahugura no kubongerera ubumenyi bwo gukora inkuru zicukumbuye kuri ruswa no kurwanya akarengane.

Umuvunyi mukuru avuga ko umuntu watanze amakuru kuri ruswa agirirwa ibanga, noneho uru rwego narwo rugakurikirana kugeza ubwo ukuri kw’ayo makuru kumenyekanye.

Ati “Ruswa kuyitangaho amakuru bisaba n’ibimenyetso kugira ngo uwayatse akurikiranwe mu mategeko, ariko habaho no kumenya uburyo akurikiranwamwo hirindwa ingaruka bishobora kumugiraho kugira ngo bikumirwe hakiri kare”.

Ibi bijyana n’uburyo bwo gutaramo inkuru kuri ruswa, kuko uwatanze amakuru arindwa kugaragazwa isura, ndetse n’ijwi rye rikaba ryahindurirwa umwimerere waryo hagamijwe kumurindira umutekano.

Itegeko ryerekeye kurwanya ruswa riteganya ko umuntu watanze cyangwa wakiriye indonke, mu rwego rwo gufasha ubutabera kubona ibimenyetso ku cyaha cya ruswa adafatwa nk’uwakoze icyaha, iyo yabimenyesheje inzego z’ubutabera mbere y’uko icyo cyaha gikorwa.

Itegeko ryerekeye kurwanya ruswa N°54/2018 ryo ku wa 13/08/2018 mu ngingo ya 19, ni ryo rivuga ku kutaryozwa icyaha cya ruswa ku muntu watanze cyangwa wakiriye indonke mu rwego rwo gufasha ubutabera kubona ibimenyetso ku cyaha cya ruswa, ntafatwa nk’uwakoze icyaha iyo yabimenyesheje inzego z’ubutabera mbere y’uko icyo cyaha gikorwa. Nta buryozwacyaha bubaho ku muntu watanze cyangwa wakiriye indonke, ubimenyesha inzego z’ubutabera mbere y’uko ikurikiranwa ry’icyaha ritangira, atanga amakuru cyangwa agaragaza ibimenyetso.

Aha ni na ho Umuvunyi mukuru Nirere, avuga ko nta muntu n’umwe ukwiriye kwikanga cyangwa kugira impungenge ku mutekano we igihe yatanze amakuru.

Gusa gutanga amakuru kuri ruswa n’akarengane abantu batandukanye baracyabitinya, kuko baba batizeye umutekano wabo nk’uko Rwemera Alexandre abisobanura.

Ati “Hazamo no gutinya kwiteranya n’abantu ndetse no gutinya ko abo mu muryango w’abo watanzeho amakuru kuri ruswa, bakugirira nabi igihe umuntu wabo yaramuka ahanwe”.

Ubu bushakashatsi bukorwa n’Umuryango Urwanya Ruswa n’Akarengane ishami ry’u Rwanda, TI-Rwanda, bwamuritswe tariki 11 Ukuboza 2024, bwagaragaje ko mu babukoreweho, abagera kuri 18.50% bagaragaje ko bahuye na ruswa mu gihe bashakaga serivisi, aho muri bo abagera kuri 2% bimwe serivisi burundu kuko banze gutanga ruswa.

Ubu bushakashatsi bwakozwe hifashishijwe uburyo bwo gutoranya impagararizi, aho muri buri ntara hatoranyijwe uturere tubiri, ak’icyaro n’akandi k’umujyi, mu gihe mu Mujyi wa Kigali bwakorewe mu turere twose.

Mu babajijwe, abagore ni 44,4%, mu gihe abagabo ari 55,6%, abari munsi y’imyaka 35 ni 42,4%, abari hagati ya 35 na 39 ni 19,7%, abari hagati ya 40 na 44 ni 14,6%, mu gihe abari hejuru ya 45 ari 23,2%.

Muri rusange ubu bushakashatsi bwagaragaje ko ikigero cyo gutanga amakuru kuri ruswa kikiri hasi, kuko 8% gusa mu bahura na ruswa, ari bo batanga amakuru.

Zimwe mu mpamvu zigaragazwa zirimo gutinya ko byabagiraho ingaruka zirimo kuba bakurikiranwa, byagaragajwe n’abagera kuri 24.7%, abagera kuri 19.2% bavuga ko batifuza ko ayo makuru yabaturukaho. Abagera kuri 17.8% bavuga ko n’iyo babivuga nta cyakorwa, 16% bavuze ko batari bazi aho batanga amakuru, abagera kuri 11.5% batinye kugirirwa nabi naho 7.3% bavuze ko abo bari kuregera na bo bashobora kuba barya ruswa.