Prezida w’Amerika Azagirana Inama n’Abakuru b’ibihugu bya Afurika

Prezida wa Reta Zunze Ubumwe za Amerika, Joe Biden kuri uyu wa gatatu yatangaje ko ateganya kugirana inama yo ku rwego rwo hejuru n’abakuru b’ibihugu bya Afurika, hagati mu kwezi k’Ukuboza uyu mwaka.

Iyo nama yo kurwego rwo hejuru hagati ya Amerika n’abakuru b’ibihugu bya Afurika, iteganyijwe kuva tariki ya 13 – 15 Ukuboza.

Biden yavuze ko iyo nama igamije kwerekana akamaro k’ubuhahirane bwa Afurika na Amerika. Izatanga kandi umurongo wo gukomeza gukorana hagati y’ibyo bihugu ku bibazo byihutirwa, bihangayikishije amahanga.

Ijwi ry’Amerika ryatangaje ko Umuyobozi ukomeye ukora muri Leta ya Perezida Biden, utashatse ko izina rye ritangazwa, yavuze ko abakuru b’ibihugu byo muri Afrika 50 ari bo bitezwe muri iyo nama.

Iyo nama izaba mu mpera z’uyu mwaka, izaba ibaye nyuma y’ingendo Perezida Biden azaba yaragize ku yindi migabane isanzwe icuditse na Amerika, irimo Aziya, Uburayi hamwe no mu bihugu byo mu burasirazuba bwo hagati.

Biden ntaragirira uruzinduko ku mugabane wa Afurika kuva yajya ku butegetsi. Inama yo mu Ukuboza izaba ari umwanya kuri we wo kurebera hamwe n’abo bakuru b’ibihugu ibintu byose biyerekeye.