Ingo zirenga 72% zimaze kubarurwa mu ibarura rusange rya gatanu ry’abaturage

Mu gihe ibarura rusange rya 5 ry’abaturage n’imiturire ririmbanyije, Ikigo cy’igihugu cy’ibarurishamibare NISR, kiratangaza ko ingo zimaze kubarurwa zirenga 72%, mu gihe ibikorwa by’iri barura bizarangira mu cyumweru gitaha.

Yvan Murenzi umuyobozi mukuru wungirije w’ikigo cy’igihugu cy’ibarurushima aganira na RBA, yavuze ko muri rusange ibikorwa by’iri barura biri kugenda neza ndetse ingo zimaze kubarurwa kugeza ubu zirenga 72% zizizabarurwa zose.

Avuga kandi ko iki kigo gikomeje gukorana n’izindi nzego ngo habarurwe abari mu byiciro by’ihariye nk’abana bashobora kuba baba mu muhanda.

Ibarura Rusange ry’Abaturage n’Imiturire ni umwe mu mishinga y’ibanze Igihugu gishingiraho kugira ngo kigene ibigomba gukorerwa abaturage byabageza ku majyambere arambye mu bijyanye n’ubukungu n’imibereho yabo ya buri munsi.

Igikorwa cy’ibarura rusange rya gatanu ry’abaturage n’imiturire, cyatangiye guhera mu ijoro rishyira ku wa Kabiri taliki ya 16 kikazageza ku ya 30 Kanama 2022.

Abaturage baributswa ko kwibaruza ari iby’agaciro gakomeye kuri buri wese, kuko bifasha mu kunoza igenamigambi ry’Igihugu. 

Barasabwa  kandi kwakira neza abakarani b’Ibarura bababaza ibijyanye n’imibereho bwite y’abantu bose batuye n’ibyerekeye imiturire n’imiterere y’inzu babamo.