U Rwanda rwatangiye kohereza ibicuruzwa binyuze mu masezerano y’isoko rusange

Ku wa gatanu, tariki ya 30 Nzeri, u Rwanda rwohereje muri Ghana ibicuruzwa bya mbere binyuze mu masezerano y’isoko rusange rya Afurika (AfCFTA).

Ibicuruzwa byoherejwe bwa mbere ni ikawa yo muri Igire Coffee Limited yajyanywe i Accra na sosiyete y’ubwikorezi bwo mu kirere ya RwandAir, ibyo bikaba bitangiye ku mugaragaro nk’inyungu z’ubucuruzi zishingiye ku masezerano ya AfCFTA.

Itangazo ryashyizwe ahagaragara na minisiteri y’ubucuruzi n’inganda ryerekana ko “Icyemezo cya mbere cy’isoko rusange cyahawe Igire Coffee kuri kawa yerekeje muri Ghana mu rwego rwo gutangiza ubucuruzi bw’isoko rusange, AfCFTA.”

Ikomeza ivuga ko iyi ariyo ntangiriro yo kongera ubucuruzi muri Afurika.

U Rwanda rwatoranijwe mu bihugu birindwi bigomba gutangira igerageza ry’ubucuruzi mu isoko rusange rya africa (AfCFTA).

Ikawa yoherejwe binyuze muri aya masezerano itunganywa n’uruganda ruyobowe na Briggette Harrington, washimangiye ko isoko rusange rya Afurika, AfCFTA, rigiye kugirira akamaro u Rwanda nyuma yo kwemezwa ngo rifashe ibihugu bya Afurika gukorana bucuruzi.

Ati: “Ntabwo dukwiriye gukomeza kwishingikiriza ku bihugu by’iburengerazuba bikomeza gutwara ibikoresho fatizo bya Afurika n’umutungo kamere biva ku mugabane ukennye. Tugomba kubihindira.”

Harrington, aganira na The New Times, yavuze ko ubwo yashinga uruganda rutunganya kawa, yayikusanyaga muri koperative z’abagore, maze akayitunganya akayohereza muri Gana. Ndetse ayo mafaranga akagaruka muri ba bahinzi mu rwego rwo kubafasha kwiteza imbere.

Harrington yakomeje agira ati: “Amasosiyete yo mu Burengerazuba yazaga hano, akagura ikiro cya kawa, reka tuvuge ku madorali atanu (5$). Bakayifata, bakayitunganya, bakayipakira bakongera bakatugarurira, bakayitugurisha ku madorari 45 y’Anyamerika, abagore bayihinze, bayigosoye, bakayoza bakanayanika, nyuma y’iyo mirimo myinshi bagakuramo amafaranga make. Ibi nibyo tugomba guhindura ”.

Yatanze urugero rwa kakao muri Ghana, kugeza mu minsi ishize, yungukiraga gusa ibihugu by’iburengerazuba byayitunganyaga bigakuramo chocolat ariko mu minsi ishize Afurika yatangiye kuyitunganyiriza aho byatangiye gutuma amafaranga yinjira mu gihugu yiyongera.

Harrington yavuze ko hamwe n’amasezerano y’isoko rusange AfCFTA, abacuruzi buzunguka ndetse bakanaganyirizwa n’imisoro binyuze muri politiki zo koroshya ubucuruzi na serivisi.

Ati: “Tugiye kohereza ibicuruzwa bitunganijwe. Ndimo gushishikariza abayobozi gutangira no kohereza icyayi binyuze mu masezerano y’isoko rusange rya Afurika. Nasabye kandi Ubuyobozi bw’Ikigo Gishinzwe Guteza Imbere Ibyoherezwa mu mahanga, gushyiraho politiki, bitarenze umwaka utaha, kugira nibura 25% by’ikawa yoherezwa mu mahanga itunganyirizwe imbere mu gihugu kandi iri janisha ryiyongere buhoro buhoro hagamijwe kugera kuri 80% by’ikawa y’u Rwanda yatunganyirijwe imbere mu gihugu.”

AfCFTA, ni ryo soko rinini ku isi, rihuza miliyali imwe na miliyoni hafi 300 by’abaturage b’ibihugu bya Afurika bigera kuri 54, bifite umusaruro mbumbe ukabakaba miliyali 2.5 y’amadorali.

Aya masezerano y’intsinzi kuri uyu mugabane yashyizweho umukono i Kigali muri Werurwe 2018.