Amerika yagabye igitero cyahitanye abayobozi batatu ba ISIS muri siriya

Umutwe w’iterabwoba wa Leta ya kiyisilamu ku wa kane watakaje abayobozi bawo batatu mu bitero bibiri Leta zunze ubumwe za Amerika yagabye mu majyaruguru ya Siriya, ku musi umwe.

Igisirikare cya Amerika cyemeje ko igitero cya mbere cyakozwe na kajugujugu mu gitondo cyo kuwa kane, cyabereye mu karere ka Qamishli, mu majyaruguru ashyira uburasirazuba ya Siriya, ahagenzurwa n’abasirikare bashyigikiye Perezida wa Siriya, Bashar Assad.

Igisirikare cya Amerika mu karere ka Siriya n’igice kinini cyo mu burasirazuba bwo hagati cyavuze ko icyo gitero cyahitanye, Rakkan Wahid al-Shammri, hamwe n’undi umwe bakorana. Abandi babiri barafashwe.

VOA, ivuga ko Al-Shammri yashinjwaga na Amerika kuba ari we wari ushinzwe kwinjiza intwaro n’abarwanyi bajya kurwana ku ruhande rw’uwo mutwe.

Igisirikare cya Amerika kivuga ko cyakoze ikindi gitero cy’indege mu majyaruguru ya Siriya, gihitana abayobozi babiri bo ku rwego rwo hejuru ba ISIS. Abo barimo Abu ‘Ala, ufatwa ko yari mu bayobozi batanu bo hujuru b’uwo mutwe, yari yungirije umuyobozi ISIS muri Siriya. Undi ni Abu Mu’Ad al-Qahtani, wari ushinzwe amagereza muri uwo mutwe.