Ingabo za Ethiopia zirashinjwa kwica imbohe zo mu ntambara 83

Raporo yasohowe ku wa mbere, ivuga ko ingabo za Ethiopia na bamwe mu banyagihugu bishe bunyamaswa abanyururu 83 bo mu Ntara ya Tigray mu nkambi iri mu majyepfo y’iki gihugu.

Iyo raporo ivuga ko ubu bwicanyi bwindengakamere bwakorewe abasirikare bafatiwe ku rugamba kuva intambara yo muri Tigray yatangira, hashize imyaka ibiri.

Ikimenyamakuru cyo muri Amerika, The Washington Post, cyavuze ko ubwo bwicanyi bwabaye tariki ya 21 Ugushyingo, 2021 mu nkambi ya gisirikare iri hafi y’umujyi wa Mirab Abaya. Iyo kambi yari ifungiwemo abarwanyi b’abanya-Tigray barenga 2,000 bafatiwe ku rugamba.

Ababibonye babwiye icyo gitangazamakuru ko abasirikare bari hagati ya 16 na 18 bamishije amasasu kuri izo mbohe, bituma zimwe zihungira mw’ishyamba no mu ngo z’abaturage begereye iyo nkambi. The Washington Post ivuga kandi ko abaturage aho kubahisha bahise babahukamo n’inkoni, babatera amabuye abandi babatemagura n’imihoro.

Ubwo bwicanyi bwabaye ubwo abarwanyi b’abanya-Tigray barimo begera umurwa mukuru wa Ethiopia, Addis Abeba. Nk’uko Ijwi ry’Amerika ribitangaza.

Intambara hagati y’ingabo za Leta ya Ethiopia hamwe n’abarwanyi bo mu ntara ya Tigray yatangiye mu Ugushyingo 2020. Izo mpande zombi ubu zirimo gushyira mu bikorwa amasezerano yo guhagarika intambara.