U Buyapani bwahaye u Rwanda inkunga izakemura ibura ry’amazi mu mujyi wa Kigali

U Rwanda n’u Buyapani byashyize umukono ku masezerano y’inkunga ya miliyoni 22 z’amadorali ya Amerika igamije gufasha kugeza amazi meza ku batuye Umujyi wa Kigali.

Aya masezerano y’iyo nkunga yashyizweho umukono kuri uyu wa kabiri tariki 07 Ukuboza 2022, ikazakoreshwa mu mushinga Ntora – Remera, uzarangira mu 2026.

Ni kenshi abaturage batuye umujyi wa Kigali bavuga ko babangamirwa n’ibura ry’amazi bagasaba kugira icyakorwa ngo icyo kibazo gikemuke.

Mu rwego rwo gukemura ikibazo cy’ibura ry’amazi, u Buyapani bwahaye u Rwanda inkunga ya miliyoni 22 mu madorali ya Amerika (hafi miliyari 22 Frw) ikazifashishwa mu mushinga wo gukwirakwiza amaze mu bice bitandukanye by’Umujyi wa Kigali.

Minisitiri w’Imari n’Igenamigambi Dr Uzziel Ndagijimana yatangaje ko ko iyi nkunga ije ari igisubizo kuko izakoreshwa mu gukemura ibura ry’amazi mu buryo burambye.

Ati: “Amazi n’isoko y’ingirakamaro ishyigikira iterambere ry’imibereho myiza n’ubukungu bw’abantu. Nk’uko biri mu ngamba z’igihugu ziterambere, Guverinoma iha agaciro gakomeye ibikorwa gutanga no kubona amazi meza kandi agera kuri bose. Ni muri urwo rwego twiyemeje kugera ku ntego yo kugeza mazi meza ku baturage muri 2024 ”.

U Rwanda n’u Buyapani bisanganywe umubano mwiza umaze imyaka irenga 60. Aho ibihugu byombi bifatanya mu nzego zitandukanye zirimo ubuhinzi, uburezi, ikoranabuhanga.

Ambasaderi w’u Buyapani mu Rwanda Masahiro Imai ashima imiyoborere y’u Rwanda ndetse n’uburyo rukoresha inkunga ruhabwa bituma ruba intangarugero muri Afurika.

Ambasaderi Masahiro, yavuze ko mu gihe ibihugu byombi byizihiza isabukuru y’imyaka 60 y’ubufatanye, u Buyapani bwishimira gukomeza gukorana n’u Rwanda.

Ati: “Mu gihe twizihiza isabukuru y’imyaka 60 y’ubucuti hagati y’u buyapani n’u Rwanda muri uyu mwaka, twiyemeje gukomeza gukorana na Guverinoma y’u Rwanda mu rwego rwo kurushaho kugeza amazi ku baturage b’u Rwanda aribyo biteganijwe muri NST-1.”

Yakomeje avuga ko Guverinoma n’abaturage b’u Buyapani bizeye ko iyi nkunga izatanga umusanzu mu kuzamura ubuzima rusange n’imibereho y’abaturage batuye Umujyi wa Kigali, kandi ikazakoreshwa mu buryo bunoze.

Biteganyijwe ko iyi nkunga izakoreshwa haba mu kugura ibikoresho bifasha mu kwegereza abaturage amazi meza ndetse no kuyakwirakwiza mu bice bya Gisozi, Kinyinya, Remera n’ahandi mu rwego rwo kugera ku ntego y’uko mu mwaka wa 2024 buri muturage azaba agerwaho n’amazi meza.