Minisitiri w’Ingabo Maj Gen Albert Murasira yakiriye Ambasaderi w’u Bushinwa mu Rwanda

Minisitiri w’Ingabo w’u Rwanda, Maj Gen Albert Murasira, yakiriye mu biro bye Ambasaderi w’u Bushinwa mu Rwanda, HE. Wang Xuekun baganira ku bufatanye mu by’umutekano.

Aba bayobozi bombi bahuye ku wa Kane tariki 08 Ukuboza 2022, baganiriye ku buryo bwo gushimangira ubufatanye busanzwe buriho mu bijyanye n’umutekano.

Ambasaderi w’u Bushinwa mu Rwanda, Wang Xuekun muri Kamena uyu mwaka nibwo yasimbuye Amb. Rao Hongwei, wari usoje inshingano ze nka Ambasaderi w’u Bushinwa kuva mu 2016.

Umubano w’u Rwanda n’u Bushinwa umaze igihe kirekire ushingiye ku bufatanye, ubwubahane ndetse no gushyigikirana. Mu Ugushyingo 2021, nibwo hizihijwe imyaka 50 y’umubano mwiza n’ubufatanye bw’impande zombi.

Ibihugu byombi bisanzwe bifatanya mu mishinga y’ishoramari, ibikorwaremezo, ikoranabuhanga, ubucukuzi bw’amabuye y’agaciro, ubwikorezi bwo mu kirere, uburezi, kubaka ubushobozi, ubuzima, ubucuruzi, ubukerarugendo, ubuhinzi, umutekano n’indi iteza urwa Gasabo imbere.

Mu 2020, u Bushinwa bwohereje mu Rwanda ibicuruzwa bifite agaciro ka miliyoni 282$ mu gihe ibyo u Rwanda rwoherejeyo bingana na miliyoni 38,7$. Ishoramari ryabwo ryageze kuri miliyoni 23,16$ rivuye kuri miliyoni 17$ yo mu 2019.