Ukraine yemeje ko u Burusiya bugiye kongera ibitero buyigabaho

Perezida wa Ukraine, Volodymyr Zelensky yatangaje ko u Burusiya bufite gahunda yo kongera imibare y’abasirikare mu rwego rwo kugaba ibitero bikomeye bundi bushya.

Zelensky yatangaje ibyo nyuma y’aho habaye igitero cyahitanye abasirikare b’u Burusiya batari bake mu mujyi wa Makiivka mu ntara ya Donetsk mu burasirazuba bwa Ukraine.

Abayobozi ba Ukraine bamaze ibyumweru bitari bike batangaza ko Perezida w’u Burusiya, Vladidmir Putin afite gahunda yo kwinjiza umubare munini w’abaturage mu gisirikare ndetse no gufunga imipaka ngo hatagira abazahunga igihugu kubera ubwoba bwo kwinjizwa mu gisirikare ku mbaraga.

Perezida wa Ukraine, Volodymyr Zelensky avuga ko abayobozi b’u Burusiya bazakora ibishoboka byose kugirango bahindure uko ibintu byifashe ku rugamba. Perezida Zelensky yabitangaje mw’ijambo yavuze mu buryo bwa videwo ku wa kabiri.

Yasobanuye ko biteguye kuburizamo gahunda y’u Burusiya ku buryo abakora ibikorwa by’iterabwoba bazatsindwa.