Mu myaka itatu abanyarwanda barenga 100 bacurujwe mu mahanga

Urwego rw’Ubugenzacyaha, RIB, rutangaza ko mu myaka itatu ishize hagati ya 2020 na 2022 abantu 150 bakorewe icuruzwa ry’abantu.

Muri 2020, RIB yakiriye ibirego 33 by’icuruzwa ry’abantu byari birimo abantu 36 bacurujwe. Abagabo bari barindwi, abagore ari 29, umubare wazamutse mu 2021 kuko abagera kuri 66 aribo bakorewe icuruzwa barimo abagabo 22 n’bagore 44. Icyo gihe bwo ibirego byari 17.

RIB ivuga ko umubare wamanutse ugera kuri 48, harimo abagabo batandatu n’abagore 42 mu 2022 baturutse mu birego 33.

Nk’uko RIB ibivuga, n’uko ikirego kimwe kiba gishobora kuvugwamo abantu barenze umwe, akaba ariyo mpamvu ituma abacurujwe baba ari benshi ugereranije n’ibirego iba yakiriye.

Uru rwego rugaragaza ko mu 150 bacurujwe harimo 68 bari munsi y’imyaka 18, ndetse n’abandi 68 bari hagati y’imyaka 18 na 30, naho 14 bari hejuru y’imyaka 30.

Mu 2020, abacurujwe bari munsi y’imyaka 18 bari 15, naho abafite imyaka iri hagati ya 18-30 bari 17 mu gihe abari hejuru y’imyaka 30 bari bane.

Mu 2021, abagera kuri 27 nibo bacurujwe bari munsi y’imyaka 18, naho 32 bafite hagati y’imyaka 18 na 30 mu gihe barindwi aribo bari bafite imyaka iri hejuru ya 30. Ni mugihe umwaka ushize RIB yakiriye ibirego by’abacurujwe bagera kuri 26 bari munsi yimyaka 18, naho 19 bacurujwe bafite hagati yimyaka 18 na 30, na batatu bari bafite hejuru yimyaka 30.

RIB yerekana ko Abanyarwanda bacurujwe mu mahanga bagera kuri 41 bagaruwe mu gihugu barimo 19 bazanywe muri 2022, 11 muri 2021, ndetse na 11 muri 2020.

Uru rwego rutangaza ko abagaruwe mu gihugu bari barajyanywe kugurishwa mu bihugu bitandukanye byo muri Aziya, Uburasirazuba bwo hagati, na Afurika y’Iburengerazuba. Hari kandi abagera kuri 24 bari bajyanywe gucuruzwa bafatiwe ku bibuga by’indege no ku mipaka berekeza mu bihugu bya Aziya, Uburasirazuba bwo hagati na Afurika y’iburengerazuba.

Umuvugizi wa RIB, Thierry Murangira, yatangarije The New Times ko hari abantu bagiye bagarurwa mu gihugu nyuma bakongera guhimba andi manyanga bikarangira bongeye gusubira muri bya bihugu.

Yagaragaje kandi ko iyo bagaruwe bagirwa inama kuko bamwe bumva ko RIB iba igamije kubabuza amahirwe yabo, bityo bikarangira bashatse ubundi buryo bwo gukomeza izo nzira.

Murangira yavuze ko amwe mu mayeri akoreshwa n’ababa bagiye kubagurisha babizeza amasezerano y’akazi keza ndetse no kwimenyereza umwuga, n’ibindi.

Dr Murangira yavuze ko iyo mibare idateye ubwoba ndetse ko hari ingamba zafashwe zo kurwanya icuruzwa ry’abantu kandi bigaragara ko umubare ugenda ugabanuka.

Atanga urugero ko abari bajyanywe gucuruzwa bagabanutse bava kuri 66 mu 2021 bagera kuri 48 umwaka ushize wa 2022.

Urwego rw’igihugu rw’ubugenzacyaha, RIB, ku bufatanye n’izindi nzego, rurwanya iki kibazo hakoreshejwe uburyo butandukanye burimo ubukangurambaga bugamije kurwanya icuruzwa ry’abantu ndetse no kumenya uburyo bwo gutanga amakuru kugirango hatahurwe ababigizemo uruhare.

Dr Murangira yatangaje kandi ko RIB ikomeje kubaka ubushobozi burimo n’ikoranabuhanga rigamije gufasha mu iperereza no gutahura inzira zikoreshwa mu gucuruza abantu.

RIB irahamagarira abantu kwirinda no kwitondera cyane abantu bose baza babegera babasezeranya kubashakira akazi keza, kwimenyereza umwuga, ubukwe ahubwo bakihutira kubimenyesha Ubuyobozi igihe cyose bahuye n’abantu nk’abo.

Dr Murangira, yongeraho ko imbuga nkoranyambaga abantu bagomba kumenya ko nubwo imbuga nkoranyambaga zihuza abantu ariko ziri mu zikomeje gukoreshwa n’abagizi ba nabi bagamije kureshya abantu.