Turukiya: Abubatse nabi inyukabo zasenywe n’umutingito batangiye gukurikiranwa

Turukiya yatangaje ko irimo gukurikirana amasosiyete agera 134 ku kuba yarubatse bitubahirije amategeko inyubako z’amagorofa ziheruka gusenywa n’umutingito ukomeye wibasiye icyo gihugu.

Kugeza ubu abantu barenga 33000 nibo bamaze kumenyekana ko bamaze guhitanwa n’uyu mutingito mugihe abarenga 92000 bakomeretse. Abashinzwe ibikorwa by’ubutabazi baracyakura indi mirambo mu bikuta by’amazu.

Minisitiri w’ubutabera wa Turukiya, Bekir Bozdag yatangaje ko ubutabera bugiye guhana uwo ariwe wese wagize uruhare mu kubaka amazu adakomeye arenga ibihumbi, bigatuma asenywa n’umutingito wo ku wa mbere mucyumweru gishize mu majyepfo ashyira uburasirazuba.

Minisitiri Bekir Bozdag yavuze ko ku cyumweru abantu batatu batawe muri yombi, ndetse barindwi bamaze kugezwa muri gereza mugihe abandi barindwi nabo bafatiwe ibihano byo kutongera gutura ku butaka bwa Turukiya.

Abacamanza batangiye gukusanya ibikoresho bifite inenge byakoreshejwe kuri izo nyubako. Abahanga mu bijyanye mu by’inyubako bavuga ko n’ubwo uwo mutingito wari ukomeye cyane ariko ko izo nyubako zitari busenyuke burundu, ahubwo byatewe no kuba zarubatswe hadakurikijwe amategeko y’imyubakire.

Perezida wa Turukiya Recep Tayyip Erdoğan, ku wa gatandatu yavuze ko uyu mutingito ari akaga kagwiririye igihugu cye.