Tito Rutaremara yagaragaje uko ikibazo cya DRC cyabonerwa umuti

Umuyobozi Mukuru w’Urwego rw’Igihugu Ngishwanama rw’Inararibonye, Tito Rutaremara yagaragaje ko ikibazo cy’umutekano muke kimaze igihe mu Burasirazuba bwa Repubulika ya Demokarasi ya Congo gishingiye ahanini ku bibazo bibiri binini birimo imiyoborere mibi ( bad governance), ndetse no kubura ubushake bwa Politiki ( lack of political will).

Ibi bikubiye mu butumwa burebure yashyize ku rukuta rwe rwa Twitter aho yagarukaga ku buryo ikibazo cy’umutekano muke muri DRC cyabonerwa umuti.

Tito Rutaremara yagaragaje ko ikibazo kiri mu burasirazuba bwa DRC, cyarangira haramutse habonetse ubushake bwa Politiki n’imiyoborere myiza. Yashimangiye kandi ko gishobora kurangizwa n’icyo gihugu ubwacyo mu gihe cyarandura imitwe itandukanye ibarizwa muri ako karere irimo nka FDLR, ADF, Red Tabara na Mai Mai.

Yatanze urugero, avuga ko Perezida Tshisekedi yasabye abayobozi ba M23 kumugira inama ku kibazo cy’uko imitwe irwanira mu Burasirazuba bwa DRC irenga 130 yatsindwa ikavaho.

Yagize ati: “Bamusabye kubafasha gushyiraho battalion 3; imwe ikava mu basirikare ba M23, indi ikava mu basirikare ba Bemba indi ikava mu basirikare ba FARDC, zigatorezwa hamwe. Uwo mutwe ugahabwa commandment imwe, nyuma bakabaha amezi 4 cg 5 bakaba babohoye eastern ya DRC yose. Icyo gitekerezo Tshisekedi yaracyemeye ariko ntiyagishyira mu bikorwa.”

Aha niho yashimangiye ko haramutse habonetse ubushake bwa Politiki, ikibazo cyo mu burasirazuba bwa DRC, gishobora kurangizwa na DRC ifatanyije n’ibihugu bifite imitwe y’iterabwoba iri ku butaka bw’iki gihugu byumwihariko mu burasirazuba bwa DRC, harimo u Rwanda, Uganda ndetse n’u Burundi.

Tito Rutaremara yagaragaje ko ibi bihugu mugihe byaba bimaze gutsinda iyo mitwe y’iterabwoba byafasha DRC gutsinda indi mitwe ya za Mai Mai iri mu Burasirazuba bwa DRC.

Yakomeje agira ti: “Hari ubushake bwa politiki, DRC ikemera gushyira mu bikorwa amasezerano yasinye yose, DRC n’ingabo z’umuryango wa Afurika y’ibirasirazuba barangiza ikibazo cy’imitwe yose iri mu Burasirazuba bwa DRC.”

Yavuze ko ingabo zose DRC yakura n’ahandi, zaza zikarangiza ikibazo cyo mu Burasirazuba bwa DRC, kuko kidakomeye cyane.

Tito Rutaremara yakomeje yibaza niba koko mu Burasirazuba bwa DRC, amahoro ashobora kuboneka mu gihe imitwe yose irwanya Leta yaba itsinzwe, maze DRC igashyira mu bikorwa amasezerano yose yemeye harimo, kwambura intwaro imitwe yose, gushyira ababikwiye mu ngabo za leta, kubasubiza mu buzima busanzwe no gucyura impunzi.

Gusa yagaragaje ko ibyo byose biramutse bikozwe neza nabyo bitahita bitanga amahoro mugihe cyose DRC igifite imiyoborere n’imikorere mibi (bad governance), igihe cyose ba mpatsibihugu bakinyunyuza ubukungu bwa DRC uko bishakiye.

Ati: “Igihe cyose ruswa n’icyenewabo n’izindi ngeso mbi zose zikirangwa mu buyobozi bwa DRC, nta mahoro DRC izagira.”

Avuga kandi ko igihe runaka haramuka habaye ibikorwa by’imyivumbagatanyo n’imidugararo aho ari ho hose muri DRC, ikibazo cyakongera kikavuka cyane cyane mu Burasirazuba bwayo.

Ati: “Kubera Uburasirazuba bwa DRC ari agace kabayeho mu gihe kirekire nta butegetsi buhamye, igihe cyose imitwe irwanya leta yakongera ikirema, ikibazo cyakongera kikavuka.”

Tito yavuze ko DRC yose nta wundi ukwiye kuyibohora uretse Abanyekongo ubwabo.

Aha niho Muzehe Tito Rutaremara agaragaz ko niba koko M23 ari barwanyi baharanira impinduramatwara muri DRC (Congolese revolutionary army), bakwiye gusahaka urundi rubyiruko rw’Abanyekongo hirya no hino barukangurire kandi barwigishe politiki ndetsebarusobanurire intego nyamukuru yo kubohora igihugu cyabo.

Ati: “Urwo rubyiruko ni rukora nk’umutwe wa Politiki uharanira impinduramatwara (revolutionary movement). Uwo mutwe uzishyiriraho ubuyobozi buzima buzayobora uwo mutwe mu kubohora igihugu cyose cya DRC, ndumva icyo aricyo cyaba igisubizo gihamye cyo kubohora DRC.”