Alain Guillaume Bunyoni yatawe muri yombi

Alain Guillaume Bunyoni wahoze ari Minisitiri w’Intebe w’u Burundi kuva ku wa Kane ari mu maboko y’inzego z’iperereza.

Amakuru y’ifatwa rya Bunyoni yagiye hanze nyuma y’aho ku wa gatatu w’iki cyumweru Leta y’u Burundi yari yatangaje ko batazi aho aherereye.

Mu kiganiro yagiranye n’itangazamakuru ku wa Gatatu, I Bujumbura, Minisitiri w’umutekano, Martin Niteretse, yavuze ko ibiro by’umushinjacyaha Mukuru wa Republika birimo kumushakisha. Gusa ariko ntiyasobanuye impamvu nyamukuru y’uko kumushakisha.

Mu gitondo cyo ku wa gatanu, umwe mu bakoresha urubuga rwa Twitter, ku mazina y’umukobwa we witwa Darlene Bunyoni, yanditse ubutumwa butabariza Se, ko ari mu maboko y’inzego z’iperereza mu Burundi nk’uko Ijwi ry’Amerika ribitangaza

Mu ntangiriro z’iki cyumweru, ni bwo amakuru ya mbere y’uko Bunyoni ntawe Uzi aho aherereye yamenyekanye. Ndetse abashinzwe umutekano bagiye gusaka Ingo ze zose ntibahamusanga.

Amakuru yahise ajya hanze yavugaga ko Bunyoni ashobora kuba yari yahunze igihugu. Ndetse ko Yaba yari yahungiye muri Tanzaniya.