Perezida Kagame yoherereje ubutumwa mugenzi we w’u Burundi

Perezida w’igihugu cy’u Burundi, Evariste Ndayishimiye, yakiriye intumwa z’u Rwanda ziyobowe n’Umunyamabanga wa Leta ushinzwe Umuryango wa Afurika y’Iburasirazuba, muri Minisiteri y’Ububanyi n’Amahanga n’Ubutwererane, Prof. Nshuti Manasseh, bamushyikiriza ubutumwa bwa mu genzi we w’u Rwanda, Perezida Paul Kagame.

Amakuru yatangajwe n’ibiro by’Umukuru w’Igihugu cy’u Burundi ku wa 26 Mata 2023, avuga ko iri tsinda ryaturutse mu Rwanda ryakiriwe na Perezida Nkuruziza, bamushyikiriza ubutumwa bwa mu genzi we w’u Rwanda.

Umubano w’u Rwanda n’u Burundi uragenda urushaho kuba mwiza, kuko Abakuru b’Ibihugu byombi bagiye babigiramo uruhare binyuze mu biganiro byagiye biba hagati yabo.

Ku ya 4 Gashyantare 2023, Perezida Kagame yagiranye ibiganiro na mugenzi we w’u Burundi, Evariste Ndayishimiye, bitanga icyizere cy’ukuzahuka k’umubano w’ibihugu byombi, wari umaze igihe urimo agatotsi.

Si Abayobozi b’ibihugu gusa bagiye bagirana ibiganiro, kuko tariki ya 19 Ukuboza 2022 igihugu cy’u Burundi cyohereje intumwa mu Rwanda, mu rugendo rw’iminsi ibiri rugamije gushishikariza Abarundi bahungiye mu Rwanda gutahuka ku bushake.

Perezida Kagame yongeye gushimangira aho umubano w’u Rwanda n’u Burundi ugeze, mu muhango wo kwizihiza imyaka 60 u Burundi bumaze bubonye ubwigenge, u Rwanda rwahagarariwe na Minisitiri w’Ububanyi n’Amahanga n’Ubutwererane, Dr. Vincent Biruta, wanashyikirije Perezida Ndayishimiye ubutumwa bwa mugenzi we w’u Rwanda.