Amerika izafatira ibihano uruhande rutazubahiriza agahenge k’intambara muri Sudani

Umunyamabanga wa Leta Zunze Ubumwe za Amerika ushinzwe Ububanyi n’Amahanga, Antony Blinken yatangaje ko abajenerali bayoboye impande zihanganye muri Sudani mugihe batubahirije amasezerano y’amahoro bashobora gufatirwa ibihano.

Blinken atangaje ibi nyuma y’aho abanya-Sudan batangaje ko impande zombi zongeye gushyamirana ku wa kabiri ku murwa mukuru i Khartoum no mu bindi bice byo mu majyaruguru.

Iyo ntambara imaze guhitana abantu babarirwa mu magana, yahinduye Khartoum n’ibindi bice isibaniro ry’intambara yeruye. Mu ntangiriro yayo, ibihugu bitandukanye byahise bitangira guhungisha abaturage babyo nyuma y’uko ibihumbi n’ibihumbi by’abanya-Sudani batangiye guhunga igihugu.

Kugeza ubu abanya-Sudani barenga miliyoni bamaze guta ingo zabo kubera iyo ntambara.

Leta zunze ubumwe za Amerika na Arabiya Sawudite ni byo bihugu bimaze ibyumweru bitari bike bihagarariye ibiganiro by’amahoro bibera mu Bwongereza, hagati y’impande zombi.

Amasezerano yasinywe mu cyumweru gishize yari ayo ku nshuro ya karindwi mu rwego rwo kugerageza guhagarika intambara ibera muri icyo gihugu kiri mu burasirazuba bwa Afrika.

Ayo masezerano yagombaga gutangira gushyirwa mu bikorwa ku mugoroba wo ku wa mbere, akaba yarabaye amwe muri menshi atarubahirijwe.

Intambara muri Sudani yatangiye mu kwezi kwa kane ubwo hadukaga ubushyamirane hagati y’abasirikare ba leta bayobowe na Jenerali Abdel Fattah Burhan n’umutwe w’abasirikare wa Rapid Support Forces bayobowe na jenerali Mohamed Hamdan Dagalo.