Kigali: Hatangijwe ibikorwa byagutse byo kubaka imihanda ya kaburimbo muri Karitsiye

Mu mujyi wa Kigali hatangijwe gahunda yo kubaka imihanda yo muri Karitsiye, aho abaturage batanze 30% naho Umujyi wa Kigali utanga 70%.

Ni igikorwa cyatangirijwe mu Murenge wa Kimironko mu Karere ka Gasabo.

Umujyi wa Kigali wari uhagarariwe n’Umuyobozi w’Umujyi wungirije, Dr Merard Mpabwanamaguru, mu gihe iyi mihanda izubakwa na kompanyi yitwa Karame Rwanda isanzwe ikora ibikorwa by’ubwubatsi.

Dr Merard Mpabwanamuguru yashimiye abaturage kuba barishatsemo ibisubizo byo gushaka 30% naho Umujyi wa Kigali ukabongerera 70% by’ingengo y’imari ikenewe. Yavuze ko iyi mihanda niyuzura kuyisana bizajya bikorwa n’Umujyi wa Kigali mu gihe yajyaga icungwa n’abaturage ubwabo.

Umuyobozi wa Karame Rwanda izubaka iyi mihanda ari we Munyakazi Sadate, yatanze icyizere ko iyi mihanda izubakwa mu bice bitandukanye bya Kigali izaba yamaze kuzura mu kwezi gutaha kwa Gatandatu, anavuga ko iri soko batsindiye biramutse bigenze neza bazubaka ibilometero 300.

Ati “Kompanyi ya Karame Rwanda mpagarariye ni yo izubaka iyi mihanda, ntekereza ko abaturage babyitabiriye nk’uko bigomba bishobora kuzagera ku bilometero 300 mu gihe cy’imyaka itatu.”

Yakomeje agira ati “Ubu twahereye mu Karere ka Gasabo, mu Kagari ka Kibagabaga, dufite undi mushinga uri Bumbogo, undi uri i Ndera, undi uri Gasogi n’undi uri Kacyiru. Iyo mishinga yose nka Karame Rwanda twamaze kuyiha amabwiriza yo gutangira imirimo. Imirimo igeze kure ku buryo mu kwezi kwa Gatandatu tuzaba twamaze gushyiramo kaburimbo.”