Silvio Berlusconi wabaye minisitiri w’intebe w’u Butaliyani yapfuye ku myaka 86

Silvio Berlusconi, wabaye Minisitiri w’Intebe w’u Butaliyani, yitabye Imana kuri uyu wa Mbere afite imyaka 86 aguye mu bitaro byitwa San Raffaele byo mu Mujyi wa Milan.

Muri Mata bivugwa ko yavuwe ‘infection’ y’ibihaha ifitanye isano n’indwara itaravuzwe, mugihe mbere uyu mukambwe yari arwaye kanseri yo mu maraso, izwi nka leukaemia.

Berlusconi yari umwe mu banyapolitiki bakomeye yageze ku butegetsi bwa mbere mu 1994 ayobora guverinoma enye kugeza mu 2011.

Yari umuherwe utunze za miliyari dore ko yari yarashoye imari mu itangazamakuru no mu mupira w’amaguru aho yari nyir’ikipe ya AC Milan hagati ya 1986 na 2017. Yanashinze televiziyo ikomeye yitwa Mediaset.

Yari asigaye ayobora ishyaka rya Forza Italia, aho muri Nzeri umwaka ushize yatorewe kuba umusenateri, nyuma yo gufatanya n’amashyaka yagejeje ku butegetsi Giorgia Meloni, minisitiri w’intebe w’Ubutaliyani uriho uyu munsi.

Minisitiri w’ingabo z’u Butaliyani Guido Crosetto yavuze ko urupfu rwa Berlusconi ari icyuho kinini cyane.