Inyeshyamba zo muri Yemen zahanuye drone y’Amerika

Abayobozi ba Leta Zunze Ubumwe za Amerika batangaje ko inyeshyamba z’aba Houthi zo muri Yemen bivugwa ko zishyigikiwe na Iran, zahanuye indege nto ya gisirikare ya Amerika itarimo umupilote (drone).

Umwe mu bayobozi ba Amerika yavuze ko iyo drone yo mu bwoko bwa MQ9 yahanuriwe ku nkombe ya Yemen n’abarwanyi b’aba Houthi. Ibyo kandi byemejwe n’umuvugizi wa gisirikare w’aba Houthi.

Bibaye mu gihe Amerika iri maso cyane ku bikorwa by’imitwe ishyigikiwe na Iran yo mu Burasirazuba bwo Hagati kuko inshuti ikomeye y’Amerika, Israel – mucyeba ukomeye wa Iran – irimo kurwana na Hamas muri Gaza.

BBC ivuga ko mu kwezi gushize, ubwato bw’intambara bw’Amerika bwahagaritse misile zo mu bwoko bwa ‘cruise’ na drone nyinshi zari zoherejwe n’aba Houthi zivuye muri Yemen zerekeza kuri Israel.

Inyeshyamba z’aba Houthi zo muri Yemen zifashwa na Iran, ndetse kuva mu mwaka wa 2014 zikomeje intambara zirwana na leta ya Yemen nayo ishyigikiwe na Arabia Saoudite isanzwe ari mucyeba wa Iran.