Hongeye gututumba umwuka mubi hagati y’ubushinwa na Taiwan

Igisirikare cy’Ubushinwa cyatangaje ko kiri maso umwanya uwo ari wo wose kandi ko giteganya gufata ingamba zose zikenewe mugihe Taiwan yafata umwanzuro wo kwigenga ikiyomora ku Bushinwa.

Ibi ni ibitangajwe mbere y’umunsi umwe ngo habe amatora akomeye, aho abaturage batuye iki kirwa kuri uyu wa gatandatu bazatora umukuru w’Igihugu ndetse n’abagize Inteko Ishinga amategeko.

Umuvugizi wa Minisiteri y’Ingabo, Zhang Xiaogang ku wa gatanu yashinje ishyaka riri ku butegetsi muri Taiwan ko riri gushora iki kirwa mu ntambara rigura intwaro muri Leta Zunze Ubumwe za Amerika.

Amahanga akomeje gukurikiranira hafi ibibazo by’u Bushinwa ndetse na Taiwan. Mu myaka ya vuba, Ubushinwa bwohereje ubwato bwabwo bw’intambara n’indege hafi y’imbibi za Tayiwani, iikirwa gituwe na miliyoni 23. Icyo kirwa kiri ku bilometero 180 uvuye ku butaka bw’Ubushinwa.