Mutsinzi Ange yakomeje, Djihad Bizimana asezererwa muri Europa League

Ikipe ya Zira FK ikinamo Umunyarwanda Mutsinzi Ange yageze mu cyiciro kibanziriza amatsinda ya EUFA Conference League mu gihe Djihad Bizimana yamusanze muri iri rushanwa nyuma yo gusezererwa kwa Kryvbas muri Europa League.

Ibi byabereye mu mikino yabaye mu ijoro ryakeye Aho amakipe y’aba bakinnyi b’Amavubi yakinaga imikino yo kwishyura y’aya marushanwa iri mu akomeye i Burayi aho Ikipe ya Zira FK yo muri Azerbaijan ikinamo myugariro Mutsinzi Ange Jimmy yari yakiriye Osijek.

Mu mukino ubanza ikipe ya Mutsinzi Ange Jimmy yari yanganyije na Osijek igitego 1-1,mu gihe muri uyu wo kwishyura iyi kipe yari yakiriye Mutsinzi Ange yanakinnyemo iminota yose warangiye Zira FK inganyije na Osijek ibitego 2-2 bituma mu mikino ibiri banganya 3-3.

Nyuma y’iminota y’inyongera yashyizweho nayo yarangiye amakipe akinganya hitabajwe penaliti maze Zira FK yinjijemo ebyiri naho Osijek yinjiza imwe byatumye Zira FK igera mu mikino ya kamarampaka aho izakina na Omonia Nicosia muri Cyprus hagati ya tariki 22 na 29 Kanama 2024.

Kapiteni w’Amavubi Djihad Bizimana nawe yari ari gukina irushanwa rya Europa League nayo yari igeze mu ijonjora rya gatatu ry’iri rushanwa. Kryvbas Kryvyi Rih akinira yakinaga na Viktoria Plzeñ yayisezereye nyuma yo kuyitsindira muri Ukraine ibitego 2-1 byasanga igitego 1-0 yari yayitsindiye muri Repubulika ya Czech mu mukino ubanza maze Djihad Bizimana wakinnye iminota 61 abanje mu kibuga asezererwa atsinzwe ibitego 3-1.

Nyuma yo gusezererwa iyi kipe ariko yahise ihabwa amahirwe ya kabiri kuko yahise ijya muri UEFA Conference League aho mu mikino ya kamarampaka ibanziriza amatsinda aho izakina na Real Betis yo muri Espagne hagati ya tariki 22 na 29 Kanama 2024.