Nta biryo n’ibinyobwa byihariye ku mubyeyi bizana amashereka-Impuguke

Impuguke mu by’imirire n’imikurire y’abana zihamya ko nta biryo runaka cyangwa ibyo kunywa byihariye bituma umubyeyi abona amashereka, igikuru ngo ni uko abona indyo yuzuye kandi ihagije.

Ibyo ni ibyagarutsweho na Mucumbitsi Alexis, umuyobozi w’ishami ry’imirire, isuku n’isukura muri Gahunda y’igihugu y’imikurire y’abana bato, ubwo yari mu kiganiro Ubyumva Ute cya KT Radio ku wa Kabiri tariki 18 Kanama 2020, cyibanze ku konsa neza.

Uwo muyobozi yemeza ko indyo yuzuye iyo ari yo yose kandi ihagije ihawe umubyeyi ituma amashereka aza, umwana akonka ku buryo buhagije.

Mucumbitsi akomeza avuga ko ikindi gifasha umubyeyi kubona amashereka uretse ibyo kurya no kunywa, ari uko aba atuje akanonsa umwana neza.

Impuguke zivuga ko kugeza ubu mu Rwanda nta kibazo gihari gikomeye cy’ababyeyi babura amashereka, kuko ubushakashatsi bwerekanye ko 99% bayagira, na ho abahura n’ikibazo cyo kubura amashereka akaba ari 1% mu babyeyi babyara, ngo bigaterwa n’impamvu zitandukanye.