Sudani na Amerika batangiye ibiganiro ku kuvana icyo gihugu ku rutonde rw’ibishyigikiye iterabwoba.

Minisitiri w’Intebe wa Sudan, Abdalla Hamdok yatangaje ko yagiranye ibiganiro n’ushinzwe ububanyi n’amahanga wa Leta Zunze Ubumwe za Amerika, Mike Pompeo ku buryo Sudani yakurwa ku rutonde rw’ibihugu bishyigikira iterabwoba, yashyizweho mu gihe icyo gihugu cyari kiyobowe na Omar Al-Bashir, wahiritswe ku butegetsi muri Mata 2019.

Pompeo yageze muri Sudani avuye muri Israel. Ni uruzinduko rukomeye kuko nirwo rwa mbere mu myaka myinshi ishize umuyobozi wo ku rwego rwo hejuru muri Amerika agiriye muri Sudani.

Nubwo ibihano by’ubucuruzi Sudani yari yafatiwe byakuweho muri 2017, icyo gihugu kiracyari ku rutonde rw’ibihugu bishyigikira iterabwoba ku buryo bibagiraho ingaruka iyo bagiye gusaba inkunga cyangwa inguzanyo ku rwego mpuzamahanga.

Minisitiri w’Intebe Hamdok yanavuze ko we na Pompeo baganiriye ku zindi ngingo zirimo inzibacyuho iyobowe n’abasivile muri Sudani, ibijyanye n’umubano mwiza hagati y’ibihugu byombi, ndetse n’uruhare rwa Pompeo mu kugarura umubano hagati ya Israel na Sudani, ibihugu bidacana uwaka guhera kubwa Bashir.

Muri Gashyantare uyu mwaka, Umuyobozi w’akanama ka gisirikare kayoboye Sudani, Gen. Abdel Fattah al-Burhan yahuye na Minisitiri w’Intebe wa Israel, Benjamin Netanyahu, ariko nta kintu kidasanzwe cyahindutse mu mibanire y’ibihugu byombi.